Vieiros

Xa hai confirmación oficial: o Ministerio de Economía recoñeceu que a contracción económica se intensificou no cuarto trimestre, polo que xa podemos falar estritamente de recesión. Había 15 anos que non se vivía unha situación económica similar no Estado Español (dende o segundo trimestre de 1993). O indicador de actividade, que reflicte a evolución do Produto Interior Bruto (PIB) caeu un 1,5%, o que supón a entrada oficial en recesión ao sumar dous trimestres de crecemento negativo.

Previsións para o futuro
Para o 2009, os analistas agardan unha contracción do PIB superior ao un por cento, ao rozar a taxa de paro o 13%, o nivel máis alto da Unión Europea. Tamén hai quen xa vaticina que a mediados de 2009 se acade outra nova fase, a da depresión (equivale a un período prolongado de ciclo económico negativo, cun elevado desemprego, baixo nivel de produción e inversión, perda de confianza das empresas, descenso de prezos e crebas empresariais).

O ministro de Economía, Pedro Solbes, xa anunciou que revisará o cadro macroeconómico do executivo a mediados do mes de xaneiro.