Vieiros

Vieiros de meu Perfil


Edición xeral

RSS de Edición xeral
VENRES E SÁBADO

Convocadas novas concentracións contra os ataques a Gaza

Os chamamentos de Galiza por Palestina terán lugar na Coruña, Ferrol, Vigo e Ourense o venres e en Ponteareas e Vigo o sábado.

Redacción - 10:30 02/01/2009

Despois das concentracións desta semana en varias cidades do país para pedir a paz e a fin das agresións aos territorios ocupados por Israel, a agrupación Galiza por Palestina, en colaboración con moitos outros colectivos sociais do país, convoca seis accións máis previstas para este venres e sábado. De novo, servirán para amosar a repulsa colectiva pola "agresión militar sionista na Faixa de Gaza" e solidarizarse co pobo palestino.

As concentracións terán lugar ás 20:30 do venres no Obelisco da Coruña, diante do Edificio Administrativo da Xunta en Ferrol e diante do Marco en Vigo. Media hora antes, ás 20 horas, está convocada outra concentración en Ourense, perante a Subdelegación do Goberno Español.

A convocatoria faise extensiva a todos os concellos. Galiza por Palestina anima, ademais, toda a cidadanía a se concentrar ás 20:30 perante os consistorios nos lugares onde non haxa fixada unha acción análoga. O sábado 3 hai previstos outros actos pacíficos diante do concello de Ponteareas, ás 12 do mediodía, e ás 19:00 horas, de novo, no Marco, en Vigo. Tamén o sábado leranse poemas, en árabe e en galego, en Galiza e en Palestina.

Galiza por Palestina pide "deter os crimes dos israelís contra os palestinos", esixe "o fin da complicidade do goberno español e das institucións europeas cos asesinos, para poñer fin ao cinismo da mal chamada comunidade internacional", e solicita que toda a cidadanía se solidarice coa causa "pendurando bandeiras e panos palestinos nos seus balcóns" e que os asistentes ás concentracións leven candeas, bandeiras e zapatos.


4.88/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: