Vieiros

O presidente do Goberno, Emilio Pérez Touriño, ten previsto asinar este luns o decreto de convocatoria de eleccións e de disolución do Parlamento, cando vence o prazo para o trámite. Os comicios terán lugar, como xa se anunciara, o 1 de marzo. Touriño fará, ademais, unha declaración institucional.

A campaña electoral abrirase o venres 13 de febreiro, de xeito que a última semana do período habilitado para a petición de voto dos diferentes candidatos vai coincidir coas festas do Antroido.

As eleccións de marzo serán as terceiras de Emilio Pérez Touriño como candidato do PSdeG, as segundas de Anxo Quintana como número 1 das listas do BNG e as primeiras de Alberto Núñez Feijoo como aspirante á presidencia da Xunta polo PPdeG. A sétima lexislatura da Cámara contou con 37 parlamentarios do PPdeG, 25 do PSdeG e 13 do BNG.

Tamén este luns está previsto que o presidente do goberno vasco, Juan José Ibarretxe, asine o decreto de disolución da cámara. As eleccións ao parlamento de Euskadi serán tamén o 1 de marzo, e a campaña electoral coincidirá coa galega.