O líder do PPdeG cualifica de “escándalo” que xubilados acudisen “enganados” a un acto en Oia.
O candidato do PPdeG, Alberto Núñez Feijoo, acusou este venres a Anxo Quintana de “secuestrar vontades” de maiores. O líder conservador referiuse deste xeito a un encontro que celebrou o BNG en Oia o pasado xoves. Algúns medios denunciaron que parte dos asistentes foron “enganados” e acudiron ao encontro con Quintana sen sabelo de antemán. Feijoo acusou ao vicepresidente de practicar o “clientelismo” durante estes catro anos cos maiores e agora e cando “sae á luz”.
A poélmica saltou logo de que algúns dos maiores presentes en Oia denunciasen diante dos medios que ninguén lles advertira que ían a un acto político. O encontro estaba organizado por dúas asociacións de maiores, que aseguran que non se enganou a ninguén.
O mesmo día do encontro, Anxo Quintana subliñou que “non hai trampa nin cartón” e que en ningún momento foi consciente de que ao acto acudía xente “enganada”. O encontro ao que acudiron 700 persoas non estivo organizado polo Bloque.