Vieiros

Vieiros de meu Perfil


Eleccións Galiza 2009

RSS de Eleccións Galiza 2009
XOSÉ LASTRA MURUAIS

"Precisamos dunha lei de educación propia"

O presidente de Nova Escola Galega achéganos unha serie de propostas que considera irrenunciábeis para mellorar no eido educativo.

Redacción - 10:30 24/02/2009
Xosé Lastra, presidente de Nova Escola Galega

Xosé Lastra, presidente de Nova Escola Galega

Xosé Lastra resume nestas seis propostas as medidas que, segundo o seu punto de vista, debería adoptar o vindeiro goberno para mellorar no eido da educación.

1. Cómpre unha decidida acción a prol da normalización do galego, que parta da actual normativa do decreto cara a unha real normalización no ámbito da educación (aínda que, loxicamente, non só neste eido). Os datos sobre a competencia lingüística en galego dos rapaces/as que rematan a escolaridade obrigatoria son realmente baixos e non se acadan os obxectivos mínimos marcados na lexislación. A administración coñece, sen actuar, todos os incumprimentos normativos e tamén esa falta de competencia no idioma. Por outra banda, os datos sobre o baixo grao de uso apuntan a unha desaparición rápida da lingua -cando menos como lingua de comunicación habitual- se non se lle pon remedio.

2. Cómpre unha asunción real dun modelo de escola pública que se dote dunha rede suficiente e dos recursos necesarios para a garantía dunha educación democrática onde non se segregue.

3. Necesitamos unha intervención decidida na escola rural que permita a educación próxima, con recursos, sen destrución de escolas e inserida nun proxecto global sobre o medio rural.

4. Galicia precisa dunha lei de educación propia, que recoñeza os nosos parámetros e que apunte a obxectivos educativos propios, sen esquecer os contextos nos que nos inserimos.

5. Cómpre unha definición rápida dos currículos (o de educación infantil aínda non está publicado a estas alturas) e dos

6. En relación co anterior, cómpre unha definición e posta ao día dos cometidos que se lle propoñen ao profesorado, e toda unha liña de actuacións tendentes a unha mellora nas condicións de traballo que son, na actualidade, insoportables. Moitos dos centros de ensino primario permanecen aínda sen persoal administrativo, o que carga o profesorado, ademais das novas demandas que a sociedade lle esixe á escola, de labores burocráticos que van en detrimento da calidade do ensino. regulamentos acaídos á situación actual (os Regulamentos orgánicos dos centros -ROC- están obsoletos, mesmo modificados por disposicións posteriores de menor rango).


4.2/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: