Vieiros

Vieiros de meu Perfil


Fwwwrando

RSS de Fwwwrando
TRANSICIÓN AO SOFTWARE LIBRE

A Xendarmería francesa aforra 50 millóns con Ubuntu

Un informe da Comisión Europea constata que unha administración pública pode aforrar moito diñeiro substituíndo os produtos de Microsoft.

Redacción - 17:00 13/03/2009

A Xendarmería francesa fixo cálculos do que aforrou por cambiar de Windows a Ubuntu Linux, e resultou que dende o ano 2004, cando comezou o proceso, evitou gastar 50 millóns de euros. O organismo público ten previsto rematar a migración do seu software no ano 2015, coa instalación do sistema operativo libre en 90 mil computadores.

Hai catro anos, o corpo de seguridade comezou o proceso de transición substituíndo Microsoft Office por OpenOffice.org. Despois foi introducindo outras solucións libres, como o navegador Firefox e o cliente de correo electrónico Thunderbird. Pero o paso máis difícil foi cando se cambiou o sistema operativo, de Windows XP a Ubuntu. A decisión tomouse despois da aparición do Vista a finais de 2006 e a súa escasa aceptación.

Polo momento, o GNU/Linux instalouse en 5 mil postos de traballo, e está previsto que se lles sumen outros 10 mil a finais de ano. Para 2015 espérase que se migre toda a infraestrutura, até 90 mil computadores.

O Observatorio Open Source da Comisión Europea publicou un informe que constata que a Xendarmería conseguiu reducir os gastos nun 70% sen que diminuísen a súa eficiencia nin a súa capacidade de funcionamento, o que supuxo un aforro de 50 millóns de euros dende o ano 2004, fundamentalmente en licenzas e mantemento.


5/5 (4 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: