Vieiros

"As manifestacións do PSdeG son as da súa dirección", sentenciou Varela, "calquera outras, son a título persoal", afirmaba esta semana o presidente da xestora do PSdeG-PSOE, o lugués Ricardo Varela, ao respecto dunhas afirmacións previas do conselleiro de Presidencia en funcións, Xosé Luís Méndez Romeu, quen en declaracións á prensa se mostrara belixerante co pacto destes catro anos e cos propios pactos locais que PSOE e BNG manteñen en cidades e vilas.

O aludido admitiu o reproche este venres en público, e anunciou que reconducirá as súas críticas. "Certamente indicáronme que reconduza a miña opinión aos órganos do partido, cousa que evidentemente farei", comentou Méndez Romeu para os medios á porta da conferencia que este venres pronunciou en Santiago o fiscal xeral do Estado, Cándido Conde-Pumpido, con motivo da apertura do curso académico da Escola Galega de Administración Pública (EGAP).

Méndez Romeu si insistiu de todas formas en que na súa opinión alén da escolla do líder que releve a Emilio Pérez Touriño á fronte do PsdeG-PSOE o seu partido debe afrontar un debate máis amplo. "É importante que haxa un debate sobre a estratexia e unha reflexión sobre as causas que puideron motivar os resultados", recomendoulle á dirección socialista. A "viveza", indicou ao respecto, demóstrase "non só pugnando polos postos, senón achegando tamén ideas", defendeu o conselleiro en funcións.