Vieiros

A nova conselleira do Mar, Rosa Quintana, mostrou a súa satisfacción porque este novo departamento teña competencias sobre os portos, xa que, ao seu xuízo, era unha expectativa creada hai tempo no sector pesqueiro, "que os portos dependan da Consellaría onde se toman as decisións".

Quintana agradeceu á súa antecesora, Carme Gallego, o "detalle" de elaboración dos informes con traballo feito e os asuntos pendentes de "un dos sectores máis importantes" de Galiza.

A nova titular de Pesca ofreceu "diálogo" ao sector, aínda que indicou que deberá cumprir o programa electoral que fixo que o PP gañase as eleccións do pasado 1 de marzo.

Pola súa banda, Gallego desexoulle "moitos éxitos" á nova conselleira e ao seu equipo e recordou a necesidade de estabelecer interlocución directa cos cidadáns neste sector.