Vieiros

Este sábado bota a andar en Compostela Mocidade Socialista Galega (MSG), o colectivo que organizará ás xuventudes de Espazo Socialista Galego (ESG) dentro de Galiza Nova. A intensa xornada comeza ás 11 da mañá coa asemblea nacional constituínte e prolongarase durante todo o día no hotel Hesperia Peregrino. Ás 18.30 horas celebrarase o acto de presentación á sociedade, no que participarán o secretario xeral de ESG, Xoán Bascuas; o portavoz parlamentario do BNG e candidato a voceiro nacional Carlos Aymerich; e o novo portavoz da organización que se elixirá durante a asemblea constituínte.

Paulo Carlos López encabeza a única lista á portavocía nacional polo que, se non hai sorpresas de última hora, será a cabeza visíbel da organización. López comenta que MSG nace "para inserirse dentro de Galiza Nova como unha corrente organizada, coa vontade de achegar un discurso fresco na procura dunha GN aberta, plural, operativa e combativa". A nivel interno pretenden introducir "novas formas de facer políticas xuvenís que sexan versátiles, imaxinativas, prácticas e dinámicas".

Esta nova corrente dentro de Galiza Nova prevé comezar co apoio de máis de 80 militantes, co que se converterían na segunda forza con máis peso dentro da organización xuvenil do BNG. Así, superarían en afiliados a Isca pero terían aínda un apoio menor ao da UMG (organización xuvenil da UPG).