Vieiros

O secretario xeral da agrupación socialista da cidade olívica, Manel Gallego, asegurou este mércores que "Vigo sae moi reforzada" tras o Congreso Extraordinario do PSdeG celebrado a pasada fin de semana e destacou que co "peso político" que adquire coloca a urbe no "núcleo duro" na toma de decisións no partido. Nunha conferencia de prensa, Gallego afirmou que o congreso "abre unha nova etapa" para o partido, con "novas ideas e novas persoas" e trasladou a disposición da agrupación de Vigo a "traballar" e estar "a pé de rúa" para escoitar á cidadanía e preparar as próximas eleccións europeas, así como os comicios municipais, xerais e autonómicos.

Gallego recordou que na executiva galega hai tres cargos da executiva local, polo que destacou o "peso político dos socialistas vigueses", con áreas de relevancia. Así, recordou que o edil Carlos López Font se encargará de Infraestruturas e David Regades levará Emprego, mentres que Xulia López será vocal. Por todo iso, mostrouse "moi satisfeito" dos resultados do congreso e "convencido" de que os obxectivos a alcanzar "chegarán a bo porto".

Finalmente, incidiu en que o encontro serviu para pechar a "crise" do partido a consecuencia da dimisión de Emilio Pérez Touriño, de quen destacou que levou o partido ás súas "máis altas cotas" de poder. Tamén aludiu ao grande apoio co que foi elixido o novo secretario xeral, Manuel Vázquez, que foi o único candidato.

Críticos
En canto ás críticas verquidas polo ex edil socialista en Vigo Gonzalo Caballero --da corrente crítica do partido--, sobre a ausencia de debate no congreso, Gallego recordou que Caballero non conseguiu a cantidade de avais necesarios para poder presentarse como candidato polo que non puido realizar unha intervención.

A este respecto precisou que "non se lle prohibiu" que interviñese, senón que, ao tratarse dun congreso extraordinario, só teñen a palabra os candidatos. Por outra banda, preguntado sobre se se abriu algunha investigación a raíz das agresións acontecidas ao peche dunha asemblea da agrupación viguesa celebrada nun hotel da cidade, Gallego recordou que durante a reunión "non aconteceu nada" e que os altercados se iniciaron "fóra" da citada asemblea. En todo caso, sobre a investigación, sinalou que "nunca" trasladou aos medios de comunicación "as cuestións internas do partido" e asegurou que manterá a súa postura de non informar destes asuntos.