Vieiros

O presidente do PPdeG ourensán, Xosé Luís Baltar, asegurou este sábado que o líder do partido, Alberto Núñez Feijoo, propoñerá o deputado Antonio Rodríguez Miranda como voceiro do partido.

Nunhas declaracións posteriores á toma de posesión dos novos altos cargos da Consellaría de Cultura e Turismo, o 'barón' ourensán asegurou que é "unha proposta que vÉn do señor Feijoo" e que a aceptou "por suposto" e "inmediatamente".

Baltar saudou que o 'número tres' do partido veña de Ourense. Asegurou que Rodríguez Miranda, nado na Bola en 1968 e ao que se referiu como 'Toñito', é "un home traballador, serio, con coñecementos e valente". "É un cacharro produto da xente de Ourense", concluíu.

O voceiro do partido acompañará na executiva 'popular' os xa confirmados Alfonso Rueda, como secretario xeral, e Xosé Manuel Barreiro como vicepresidente. Tamén formarán parte do novo Comité Executivo os outros tres presidentes provinciais do PPdeG, Carlos Negreira (A Coruña), Rafael Louzán (Pontevedra), e Xosé Luís Baltar (Ourense), ademais de Manuel Ruíz Rivas como voceiro parlamentario, a presidenta de Novas Xeracións, María Seoane, e os voceiros das sete grandes cidades. Tamén estarán tres residentes no exterior representando a emigración e 28 vogais.