Vieiros

O PSdeG-PSOE abriu a campaña para as eleccións ao Parlamento europeo en Compostela, cunha pegada de carteis virtual. O secretario xeral do partido, Manuel Vázquez, cualificou os comicios de "fundamentais" para que Galiza participe nas decisións europeas.

Segundo Vázquez, o país "xa está empezando a padecer as receitas da dereita", co novo Goberno, e considerou que estas políticas "buscan axudar os que provocaron a crise e non os que a padecen". En contraste, apostou por "políticas sociais, sostíbeis, pola loita polo cambio climático e por políticas de igualdade", das que dixo que o Estado Español exerce o liderado europeo.

Volveu arremeter contra o goberno de Núñez Feijoo, asegurando "que toma as decisións pensando sempre nos que máis teñen", fronte a "un goberno progresista como o de Zapatero".

No acto socialista tamén estivo presente o candidato ao Parlamento europeo Antolín Sánchez Presedo, que dixo que estas "non serán unhas eleccións rutinarias" e cualificounas como as "máis importantes da historia de Europa". Segundo Sánchez Presedo, "a visión e as receitas da dereita fracasaron".