Vieiros

Sen malos fumes, ruídos nin atoamentos. Así lles animan a practicar o san exercicio do desprazamento en bicicleta polas rúas da Coruña este mesmo sábado. Toda a cidadanía está convidada a participar nesta actividade, organizada polo grupo da Masa Crítica na urbe herculina. O percorrido recomendado, a xeito circular, vai no treito Porta Real – Praza de Ourense.

"Esta marcha social pretende dar un toque de atención ás nosas adormecidas autoridades" á vez que estimula a opción dos cidadáns a prol do uso diario de transportes alternativos ao automóbil. "É posíbel acougar o tráfico motorizado nas cidades e reducir o seu volume até civilizalo e facelo compatíbel coas funcións e actividades que realizamos nas rúas", sosteñen os convocantes.

"Coa vosa participación conseguiremos unha cidade máis humana, tranquila e menos contaminada", propoñen.