Vieiros

Vieiros de meu Perfil


GZ-Sete

Edición xestionada por Vieiros
RSS de GZ-Sete
Ampliación do aeroporto de Alvedro

Botando toneladas de terra sobre unha vila

Son máis de sete mil as alegacións en contra. Os afectados non comprenden que intereses hai en continuar cun proxecto que achegará tan poucos beneficios e tantos problemas.

A. Rodríguez - 08:00 03/06/2009
Imaxe da sala, facilitada polo Concello de Culleredo, onde se reúne a plataforma de afectados

Imaxe da sala, facilitada polo Concello de Culleredo, onde se reúne a plataforma de afectados

Culleredo é un dos concellos que se verá afectado pola ampliación do aeroporto coruñés de Alvedro. Se cadra, o que máis. A catro montes do contorno da vila de Culleredo hanlles coller toneladas de terra, rebaixándoos, que se ha empregar en encher o val, para que aumente a pista. Ao medrar ao longo, 400 metros, a pista tamén crecerá ao alto, creándose un talude que, nalgunhas zonas, chegará a ter unha altura de 50 metros, ante as portas das vivendas dos veciños que máis perto viven da pista. A outros veciños deste municipio coruñés expropiaranlle as súas casas -as situadas na zona pola que se fará a ampliación-; a todos, contaminarlles, un chisco máis, o ar con combustíbeis e son; modificaralles o Plan Xeral de Ordenación Municipal polo que se rexe o seu municipio; e alteraranlles o sono coas obras, que se han facer de madrugada para non influír nas saídas e chegadas dos voos. Para todo terán que pedir permiso a Aena, mesmo para ampliar unha súa vivenda, construír unha outra... Tamén nos concellos de Cambre e Culleredo terán que pedir permiso para seguir adiante co seu PXOM.

Son unha manchea de problemas sociais, ambientais e económicos os que produce esta ampliación; e ben pouco beneficio a un aeroporto do que despegan e no que aterran, sobre todo, voos peninsulares e que se atopa a pouco menos de 40 minutos do de Lavacolla, en Compostela.

"Atopámonos con algo moi grande para nós, mais procuramos información e datos que nos dan a razón"
A Culleredo chegamos un destes días de calor inmenso. Tardamos abondo en cruzar Vilaboa, e chegar ao predio do Concello, na pequena vila que leva o mesmo nome. Na Casa do Concello teñen a súa base os veciños que conforman a plataforma de afectados pola ampliación do aeroporto de Alvedro.

Os membros da plataforma xúntanse nunha sala ampla, a carón dunha terraza dende a que se pode observar, á perfección, a zona pola que a pista de aterraxe de Alvedro pretende medrar, levando por diante perto de 30 vivendas, unha fábrica e unha escola. Ao crecer cara adiante, a pista ha quedar a só 150 metros da mesma Casa do Concello.

"Mais eles -os que quedan sen vivenda- non son os que peor están", di Johnny Ornia, voceiro da plataforma, sinalando que polo menos estas persoas han recibir unha compensación económica, e serán realoxados, mentres que o resto de veciños han vivir cun talude de perto de 50 metros nalgunhas zonas á porta da casa, alén de sufrir, día a día, a contaminación e o potente e molesto son producido polo tráfico aéreo, que ademais será ampliado, xunto coa pista. Despois ensina as cadeiras que hai situadas en círculo na sala de xuntanzas, facilitada polo concello, e di de brincadeira: "Aquí facemos as terapias de grupo". Na parede, os mapas da zona, nos que explica o que vai supor a ampliación da pista, non só para os veciños de Culleredo, senón tamén para os de Oleiros e Cambre, cuxos Plans Xerais se verán afectados polas obras, unha vez medre a pista.

"Cando soubemos da ampliación do aeroporto, atopámonos con algo moi grande para nós, polo que tivemos que crear un equipo multidisciplinar, con avogados, arquitectos, técnicos... e procurar asesoramento e a axuda de alguén que xa pasase por isto -a asociación española de Afectados polo Impacto Aéreo-, xa que nestes casos, a información é o máis importante", recalca Ornia, lembrando que en todo este proceso, eles manexaron os datos facilitados por Aena, no informe ambiental, analizándoos e explicándollos aos veciños da contorna: "Sempre achegamos datos obxectivos, sen querer entrar en ningunha polémica. Nós non estamos en contra do aeroporto, senón da súa ampliación; e por datos, baseándonos neles, non entendemos o que aquí se quere facer", sinala o voceiro da plataforma.

"Por este concello pasa absolutamente todo: a autoestrada, a terceira rolda, a depuradora, o aeroporto..."
"Xusto este é o único punto no que non se debería ter construído este aeroporto, xa que os ventos son moi fortes, e pola noite non se pode aterrar por causa do monte Xalo", di Ornia, recalcando que polo concello no que vive "pasa absolutamente todo: a autoestrada, a terceira rolda, a depuradora, o aeroporto...".

A seguir, vén unha listaxe de eivas do plan que presentou Aena para que sexan licitadas as obras de ampliación de Alvedro, que, segundo a plataforma de afectados de Culleredo, "parece que fixeron o típico informe-tipo, porque lles esqueceron moitas cousas". Primeiro, no informe de Aena non se contempla a retribución das persoas que van perder os seus fogares, mais tampouco o seu realoxo, que non será posíbel nun concello onde o 60% do territorio se verá afectado polas obras: "Non vai quedar sitio para realoxar estas familias", dixo Ornia. Alén disto, os traballos de desmonte realizaranse polas noites, "para non afectar o normal desenvolvemento das actividades do aeroporto", pero que, pola contra, si han afectar o descanso dos veciños. Alén disto, están as medicións do son dos avións, que segundo os veciños, serán o duplo -recorreron a unha empresa independente para facer as súas propias medicións- do que recolle Aena no seu informe; sen contar cos ruídos dos desmontes, das obras e dos camións dumper, que levarán as toneladas de terra dos montes da contorna para a nova pista.

Despois están os permisos. Unha vez se amplíe Alvedro, tamén medra a zona de influencia de Aena, de tal xeito que se alguén quere terminar unha obra comezada nesta zona, ou facer unha nova (isto tamén afecta os concellos de Oleiros e Cambre), será este ente estatal o que deberá facilitar os permisos. Sen falar da perda de valor das casas que se situarán a poucos metros da nova pista (algunhas, pegadas ao talude de terra de 50 metros de alto), que fará que algúns veciños sigan a pagar o mesmo importe na súa hipoteca, por unha vivenda que agora custaría moito menos.

"Non vemos xustificada esta obra, nin política, nin económica nin socialmente"
Alén disto, está tamén a terceira rolda da Coruña, que pasa por este concello e por un dos montes que, segundo o informe de Aena, sería un dos que habería que tirar terra, para ampliar a pista. "Nin isto contemplan dende Aena", sinala Johnny Ornia, ao tempo recalcando que "tampouco saben se a terra dos montes seleccionados da contorna lles vai chegar para cubrir as toneladas de terra que lles fan falta; e non contemplan o que acontecerá cos ventos, cando rebaixen estes montes". Nesta liña, Ornia recalcou que os veciños por veces quedan "asustados" ao ver a pouca concreción coa que se elaborou este informe de Aena: "nin sequera saben se lles van chegar os cartos, polo que desglosaron o investimentos en tres partes". "A xente está asustada, e non ve xustificada nun política, nin económica nin socialmente esta obra"

"Aquí asistimos a auténticos dramas humanos. A maioría dos veciños desta vila son persoas maiores, que levan toda a vida morando nestas vivendas, neste val", recalca o voceiro da plataforma veciñal, sinalando que opoñerse á ampliación de Alvedro chega a ser, moitas veces, "unha cuestión de lóxica".

"Nós non estamos contra o aeroporto, pero pensamos que o que debería haber en Galiza sería un aeródromo internacional e dous estatais, porque hai que ter en conta que coa chegada do TAV, os viaxeiros de Alvedro -que, por certo, cada vez son menos-, han diminuír, como aconteceu en Barcelona ou Sevilla; e que, por outro lado, estamos a un pouco máis de 30 minutos de Lavacolla, e ás veces tardas menos en chegar a Compostela que en cruzar Vilaboa dende A Coruña", dixo Ornia.

"Con información obxectiva, a xente pode chegar a pensar"
Cando son preguntados sobre que intereses pensan que hai detrás desta ampliación, porque se segue adiante, cando é un proxecto que fai máis dano que aporta beneficios, Ornia só di que ve "unha falta total de información por parte da xente de Coruña", feito do que culpa a "varios medios de comunicación, que non é que saquen o que lles interesa dos nosos actos, ou dos datos que facilitamos; senón que simplemente nos silencian".

Outros membros da plataforma, que asistiron a esta entrevista, culparon unicamente o "delirio localista" da Coruña e da súa agrupación municipal, por turrar cara adiante cunha obra que "non ten sentido ningún", e que está avalada por "argumentos que non se sosteñen, que non son certos ou que non foron probados".


4,58/5 (12 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Nun dos montes que han rebaixar, unha faixa na que se pode ler 'Queremos vivir. Non á ampliación' (clique para ampliar)
Nun dos montes que han rebaixar, unha faixa na que se pode ler 'Queremos vivir. Non á ampliación' (clique para ampliar)
Nesta imaxe, algunhas das casas que han desaparecer coa ampliación da pista (clique para ampliar)
Nesta imaxe, algunhas das casas que han desaparecer coa ampliación da pista (clique para ampliar)
Dende a terraza da Casa do Concello de Culleredo. As árbores desaparecerán, xa que a nova pista quedará a 150 metros do predio (clique para ampliar)
Dende a terraza da Casa do Concello de Culleredo. As árbores desaparecerán, xa que a nova pista quedará a 150 metros do predio (clique para ampliar)
Marcado cun valado vermello, o final da pista actual, e a zona pola que vai medrar 400 metros
Marcado cun valado vermello, o final da pista actual, e a zona pola que vai medrar 400 metros
A pista de Alvedro, pegada ás casas pola súa banda dereita (clique para ampliar)
A pista de Alvedro, pegada ás casas pola súa banda dereita (clique para ampliar)
Final da pista, zona pola que ha medrar 400 metros (clique para ampliar)
Final da pista, zona pola que ha medrar 400 metros (clique para ampliar)
Un dos montes, cuxa terra se había empregar nesta obra, é polo que se está construíndo a terceira rolda da Coruña
Un dos montes, cuxa terra se había empregar nesta obra, é polo que se está construíndo a terceira rolda da Coruña
Ollando como despegan os avións en Alvedro / Flickr: wicho
Ollando como despegan os avións en Alvedro / Flickr: wicho
Un avión aterrando en Alvedro, a carón das casas / Flickr: wicho
Un avión aterrando en Alvedro, a carón das casas / Flickr: wicho