Vieiros

Vieiros de meu Perfil


Europeas 2009

RSS de Europeas 2009
Peche de campaña: cara o 7X

“O BNG é a única formación que representa en Europa os intereses galegos”

Guillerme Vázquez pide o "voto masivo" para os nacionalistas, e Ana Miranda, a candidata da formación, afirmou que "é a única maneira de levar unha voz galega" ao Europarlamento.

Redacción - 10:15 06/06/2009
Vázquez e Miranda en Vigo, no peche de campaña

Vázquez e Miranda en Vigo, no peche de campaña

O BNG pechaba a campaña para as eleccións europeas deste domingo 7 de xuño en Vigo. Alí estaban a eurocandidata do BNG, Ana Miranda, e seu o voceiro nacional, Guillerme Vázquez, e ámbolos dous coincidiron en pedir o "voto masivo" para os nacionalistas, xa que é "a única formación que representará e defenderá" os intereses de Galiza en Bruxelas.

Nesta liña, Vázquez falou da necesidade de teren os galegos e galegas unha "representación en Europa", para contribuír "xunto con millóns de cidadáns" a construír "outro modelo de Unión Europea", a unión dos pobos. Despois de facer un repaso polas necesidades que Galiza ten en Europa, e polos "erros" que os distintos gobernos españois cometeron en canto ao reparto de fondos, axudas e cotas, Vázquez falou tamén do conflito do metal, pedíndolle a todas as partes -patronal, traballadores e policía-, que traballen por terminar con el "canto antes". Para isto, sinalou, "é necesaria a intervención da Xunta ao máximo nivel, xa que Goberno ten a obriga de redobrar os esforzos para chegar a un acordo".

Polo seu lado, a candidata do BNG a europarlamentaria, Ana Miranda, fixo un chamamento ao "voto masivo" para a formación, sinalando que este é "un voto optimista, útil para a terra" e "a única maneira de levar unha voz galega a Europa". "Galiza vai estar en Europa da man do BNG, e será para facer unha Europa social, máis solidaria e máis ecolóxica", recalcou Miranda.


4.67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: