Vieiros

Vieiros de meu Perfil


Europeas 2009

RSS de Europeas 2009
Peche de campaña: cara o 7X

“O PSOE gañará en Europa, aínda que sexa no último momento e de penalti”

Xosé Blanco, Carmela Silva e Elena Espinosa estiveron nos actos de peche de campaña en Galiza, acompañando o candidato do PSdeG á Eurocámara, Antolín Sánchez Presedo.

Redacción - 10:30 06/06/2009
O candidato do PSdeG ás eleccións europeas, Antolín Sánchez Presedo

O candidato do PSdeG ás eleccións europeas, Antolín Sánchez Presedo

O vicesecretario xeral do PSOE e ministro de Fomento, o ulloán Xosé Blanco, estivo acompañando o secretario xeral do PSdeG, Manuel Vázquez, e o eurocandidato da formación, Antolín Sánchez Presedo, no peche de campaña que os socialistas galegos desenvolveron en Vigo esta sexta feira. Alí, Blanco pediulle "aos progresistas" que voten "masivamente", e asegurou que será o PSOE quen gañe os comicios europeos o vindeiro domingo, "aínda que sexa no último minuto, e de penalti".

No mitin que se desenvolveu no barrio d'O Calvario, Blanco considerou "moi importantes" estas eleccións, xa que, segundo dixo, o seu partido está "á vangarda da esquerda en Europa". Nesta liña, destacou que os galegos tamén xogan este domingo a posibilidade de ter "o partido máis comprometido socialmente en Europa", en referencia á súa propia formación, e criticou duramente o PP e a "dereita" que "quere regular as nosas vidas e que ninguén regule os seus negocios". Nesta liña, e denunciando a "dobre moral e a hipocrisía" da dereita, chamándolles "vagos" a Mayor Oreja e Luis de Grandes -europarlamentarios do PP-, Blanco volveu recalcar a intención do PSOE de "mobilizar o maior número de recursos" para o país.

Vázquez censura o "modelo rancio de Feijoo"
Polo seu lado, o líder dos socialistas galegos, Manuel Vázquez, contrapuxo a actitude do ministro de Fomento, de "mellorar o TAV a Galiza" coa postura da "Xunta do PPdeG, de parar o desenvolvemento porque hai moitas dificultades". Así, censurou o que chamou "modelo rancio" de Feijoo, "que di que a crise arránxase paralizando e cunha estratexia anti-Vigo", citando proxectos como a nova depuradora, o cuarto hospital ou a Cidade do Mar. No mitin tamén estaban, ademais de Sánchez Presedo, a voceira dos socialistas no Senado, Carmela Silva, e o alcalde de Vigo, Abel Caballero.

De mañá, ademais, estivo a ministra de Medio Ambiente, Medio Rural e Mariño, a ourensá Elena Espinosa, n'A Coruña, onde lle pediu aos galegos que "voten, e voten socialista", porque "non se debe pensar que todos os dereitos están consolidados", e co fin de evitar que domine o Parlamento europeo "a dereita rancia e antiga".


3.67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: