Vieiros

Aos poucos, vamos coñecendo toda a nova estrutura organizativa do ente público da Compañía da Radio Televisión de Galiza (CRTVG). Primeiro foi o máximo responsábel, Alfonso Sánchez Izquierdo e logo as directoras de Radio e Televisión, Rosa Martínez e Rosa Vilas. Despois, o Parlamento aprobou os novos compoñentes do Consello de Administración e, agora, vanse coñecendo xa polo miúdo os demais nomeamentos. O último foi o de Pilar Bermúdez como nova directora de informativos da TVG, e os catro redactores xefes que a acompañarán: Xosé Manuel Díaz Maseda, Alfredo César Malde, Xosé Octavio Rodríguez Nieto e Fernando González Macías.

Pluralidade informativa
En todo momento, o novo director e o presidente da Xunta comprometeron uns medios de comunicación pluarias. Con todo, o Comité Interempresas xa manifestou o seu "fondo malestar e preocupación" polos nomeamentos: "ao noso entender, non se axustan a criterios organizativos ou profesionais senón que, pola contra, parecen máis ben motivas por intereses sectarios e de partido". Así, fan constar que "con estes nomes retrocédese no tempo incorporando a directivos que catro anos atrás deixaron a empresa no casor organizativo e económico de todos coñecido e limitaron de xeito intolerábel a pluralidade informativa".

Suposta austeridade
A CRTVG anunciou tamén que reducirá os seus directivos nun 20%, pasando de 52 a 38, unha redución que afecta especialmente a televisión. Non o vén así tampouco dende o comité: "o novo organigrama busca máis o efecto publicitario dun titular de prensa no que se fale de austeridade, que a eficacia e a operatividade para levar a cabo as tarefas de servizo público". Ademais, denuncian que os novos membros do Consello de Administración "veñen de aprobar un aumento de retribucións que lles suporá uns ingresos anuais superiores aos 80 mil euros".