Vieiros

Entre xaneiro de 2008 e marzo deste ano as familias galegas que se dedican á produción de leite viron como descendía un 35% os seus ingresos brutos. Segundo un estudo elaborado pola Asociación Galega Serra do Bocelo, unha explotación media do país (cunha cota anual de 151 mil litros) tería perdido de ingresar neste período un total de 24.726 euros. Mentres, pola contra, os custes de produción terían subido substancialmente.

Serra do Bocelo fai este cálculo logo de analizar a morfoloxía das algo máis de 12 mil granxas galegas. Máis do 65% das mesmas teñen unha cota inferior aos 150 mil litros anuais; un 30,6% producen entre 150 e 500 mil litros ao ano: mentres que menos dun 4% das granxas ten un nivel de produción superior ao medio millón de toneladas cada ano. Da perda de riqueza que se está a dar coa caída do prezo do leite dá idea o dato de que Galiza produce 2,2 millóns de toneladas ao ano, o que significa máis do 36% de todo o Estado Español.

Alternativas

A asociación recomenda a existencia dun contrato homologado, a busca dun prezo mínimo para o leite, o control do “dumping” e o traballo orientado para a creación dun gran grupo lácteo galego. Ademais, Serra do Bacelo pide que se potencien ferramentas como o Banco de Terras, que axuda a aforrar en custes de produción.