Vieiros

Vieiros de meu Perfil


Edición xeral

RSS de Edición xeral
Moción de censura en Gondomar

A dirección do PSdeG botará os edís implicados e o BNG ve intención do PP de "trasfegar outra vez o urbanismo"

O secretario de Organización do PSdeG-PSOE considera transfuguismo o acontecido e avanza que os catro concelleiros socialistas serán expulsados.

Redacción - 18:15 25/06/2009

"Serán expulsados do partido de forma inmediata unha vez a moción sexa aprobada en pleno", advertiu este xoves o secretario de Organización do PsdeG-PSOE, Pablo García, ao respecto dos catro edís do partido en Gondomar que pecharon acordo co PP para a presentación dunha moción de censura que colocará un candidato popular na alcaldía.

García subliñou a "absoluta desvinculación" do PSOE desta moción de censura e reprobou a actitude dos que até o de agora eran os concelleiros do seu partido. Afirma ao respecto que o acontecido trátase dunha acción "unilateral e persoal dos edís" que non comparte nin e Executiva do PSdeG nin a executiva socialista local. Por este motivo, "tal e como marcan os Estatutos, serán expulsados do Partido Socialista de forma inmediata unha vez a moción sexa aprobada en pleno".

O responsábel de Organización do PsdeG considera que por tras do acontecido está a dirección do PPdeG. "Tanto este caso como os acontecidos nos últimos meses en distintos concellos de Galiza instigados por parte do PPdeG son inaceptábeis e alteran a normalidade democrática da vida política do país", láianse os socialistas nun comunicado, recordando que se racha o pacto antitransfuguismo asinado a nivel estatal.

O BNG ve intereses urbanísticos por tras da moción
O voceiro nacional do BNG, Guillerme Vázquez, opinou este xoves que a moción de censura baséase na intención de "trasfegar outra vez o urbanismo" e aseverou que "non hai xustificación ningunha" para presentala. Para o líder do Bloque o acontecido é "evidencia de que o PP quere conseguir a alcaldía para facer o que fixera até o de agora", fronte ao BNG "que desterrou a corrupción urbanística" do municipio.

Así, avisou de que "non hai nin desgoberno nin demanda social" que reclamen esta moción de censura, tras o que o dirixente nacionalista se preguntou "por que ten tanta présa o PP", se vai haber unhas eleccións en 2011. "Trátase de recuperar as prácticas corruptas", subliñou. Así mesmo reclamoulle ao líder do PPdeG, Alberto Núñez Feijoo, que desautorice a moción. "Non era el o que dicía que un condenado non aguantaría nin cinco minutos no seu partido", reprochoulle en referencia ao ex rexedor de Gondomar e aínda edil no Concello, condenado por prevaricación.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: