Vieiros

"Non explican que fondos nin que partidas reducen para obter a cifra final", denunciou esta quinta feira o voceiro parlamentario do PSdeG, Xaquín Fernández Leiceaga, sobre o anuncio de reformulación orzamentaria presentado pola Xunta. Reclamoulle Leiceaga ao presidente da Xunta "que diga quen son os damnificados" e agoirou que as decisións políticas da dereita "sempre prexudican os máis necesitados".

De xeito concreto falou o deputado socialista do apartado adicado á actividade empresarial, advertindo de que "o suposto plan" sería en realidade unha "operación de maquillaxe e cambio de nome" das políticas desenvolvidas polo Igape co bipartito. Por outro lado, criticou con dureza que Feijoo falase de iniciativas de fomento de produtividade do tecido industrial ao tempo que se produce, subliñou, "un dos maiores bloqueos á licitación de obra pública desde a Xunta", indicando que os últimos meses baixou un 90 por cento con relación á media mensual de 2008. Tamén se queixou de falta de concreción das medidas de dinamización do medio rural, definíndoas de "declaración de boas intencións de calculada ambigüidade".