Vieiros

Vieiros de meu Perfil


Edición xeral

RSS de Edición xeral
Obras de Iberdrola no Sil

O PSdeG pídelle á Xunta que "acenda as alarmas ambientais"

O seu secretario xeral e ex conselleiro de Medio Ambiente, Manuel Vázquez, defendeu a súa actuación cando estaba no Goberno.

Redacción - 17:45 16/07/2009
As máquinas no Sil / Foto: Adega

As máquinas no Sil / Foto: Adega



O secretario xeral do PSdeG e ex conselleiro de Medio Ambiente, Manuel Vázquez, cualificou este xoves de "espectaculares" as fotografías que ilustran a seca dun tramo do Sil provocado polas obras da nova central hidroeléctrica Santo Estevo II que realiza a empresa Iberdrola.

Súmase así a denuncia presentada este mércores polo BNG facéndose eco das declaracións de ecoloxistas, veciños e concellos que afirmaban que a empresa comezou as obras "antes de ter autorización" e sen as "someter a información pública".

"Todas as alarmas ambientais teñen que estar acesas", advertiu o dirixente socialista nunha rolda de prensa organizada en Compostela, na que instou o Goberno da Xunta a "comprobar" que as obras que está levando a cabo a firma se "adecúan" ao proxecto que ten aprobado.

Vázquez insistiu en que a Xunta "debe pór todas as cautelas" para "protexer" a canle do río Sil posto que, ao seu xuízo, o "impacto" das obras é "evidente". "Aquilo afecta a flora, a fauna e o hábitat", aseverou.

Argumentos do Ministerio

O Canón do Sil é un LIC incluído na listaxe enviada a Bruxelas dos lugares protexidos pola Rede Natura. Porén, en Galiza non se aprobou o plan de conservación de uso dos lugares protexidos, o que lle serviu ao Ministerio español de Medio Ambiente para autorizar a nova hidroeléctrica.

Ao respecto, Manuel Vázquez defendeu a súa actuación cando estaba á fronte da Consellaría de Medio Ambiente na Xunta. "Impulsamos un sistema de protección de Rede Natura", lembrou.


Ligazóns

5/5 (7 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: