Vieiros

Vieiros de meu Perfil


Edición xeral

RSS de Edición xeral
Piden "rachar co pasado eólico galego"

A FEG agarda "novos aires" e un plan eólico baseado "en criterios de responsabilidade"

A plataforma ecoloxista avalía como "boa nova" a decisión de paralizar a adxudicación dos 2.325 MW repartidos na anterior lexislatura.

Redacción - 09:30 12/08/2009

"A concesión eólica pretendida pola anterior consellaría de Industria, liderada polo BNG, no caso de se consumar acadaría un grao de impacto ambiental e paisaxístico que sorprendería e incluso, horrorizaría á maioría dos galegos no caso de comprobar os seus efectos sobre o territorio e que se sumaría ao xa creado durante a era Fraga e que tanto criticara o BNG". Así o reflexionan desde a Federación Ecoloxista Galega (FEG), ao respecto da actualidade eólica no país, nun comunicado enviado aos medios onde lembran que xa presentaran no seu momento un recurso onde solicitaban a anulación e suspensión "preventiva" da orde do 6 de marzo de 2008 sobre a tramitación de parques eólicos.

Por este motivo, a FEG recibe "como boa nova" a decisión agora da Xunta de paralizar a adxudicación dos 2.325 megavatios repartidos polo anterior goberno. Consideran os ecoloxistas que o bipartito quixo aproveitar "resortes legais do plan eólico da era Fraga" permitindo 78 parques que "non eran sometidos á normativa europea de avaliación estratéxica ambiental". Logo da suspensión do decreto a pasada semana, a FEG explica agora que agardan "novos aires" na forma de entender a aposta polo desenvolvemento do sector. Ao respecto propoñen que o novo plan éolico estea baseado en "criterios de responsabilidade" e que teña en conta "o verdadeiro valor das montañas e serras galegas, que son o berce do patrimonio rural, cultural, e ambiental do noso territorio".

De xeito concreto esixen que o novo texto se somete á avaliación estratéxica ambiental, "tendo en conta os plans de conservación da Rede Natura, a Directiva de Hábitats ou a Lei do Patrimonio Natural e da Biodiversidade", que contemple expresamente un capítulo con áreas de exclusión por motivos ambientais e culturais e que incorpore o "principio de cautela" ou precaución, co que cada posíbel concesión eólica veña acompañada dunha avaliación de "opcións alternativas menos prexudiciais asentadas en principios de sustentabilidade".


3.67/5 (9 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: