Vieiros

Informes da propia administración británica cualificaran de excesivas algunhas das ideas manexadas desde hai meses, como era o caso da posibilidade de obrigar as operadoras a reducir a velocidade das conexións de usuarios de P2P. Paradoxalmente, agora transcende que a lexislación en proceso non só non afrouxa aquelas iniciativas senón que mesmo endurece a persecución por parte do goberno sobre os internautas que comparten arquivos.

"As propostas previas, aínda que robustas, necesitarían dunha inaceptábel cantidade de tempo para completarse nunha situación que require de acción urxente", expón o borrador do novo plan, tal e como revela este martes o xornal británico The Guardian.

A publicación especula coa posibilidade de que a viraxe na postura do goberno teña que ver coa recente xuntanza de Peter Mandelson, secretario de Estado para Empresa e Innovación, con altos representantes da industria audiovisual, ao fío da cal se falou dun posíbel "pacto secreto" en favor das belixerantes posicións maioritarias que sobre este tema manteñen a industria da música e o cinema.