Vieiros

"A defensa da verdade, a austeridade, o realismo e o galeguismo". Velaí os que o líder do PPdeG e presidente da Xunta, Alberto Núñez Feijoo, cualificou este sábado de "faros" da súa acción de Goberno. Foi durante o acto formal que o seu partido organizou para apertura do curso político á volta das vacacións de verán e, durante a súa intervención, dixo sentirse especialmente orgulloso de "democratizar o sentimento galego fronte aos que querían apoderarse del".

Recordou Núñez Feijoo o similar acto do seu partido hai un ano, daquela na oposición, indicando que naquel momento a súa formación comprometeuse "a dicir a verdade aínda que esta fose dura, a unir esforzos en lugar de vivir na confrontación, a afrontar os retos e non a esquivalos, a pensar en propostas e non en distraccións, a defender a liberdade e non a imposición". Subliñou Feijoo que todos eses compromisos "estanse cumprindo".

Prioridade: levar a Rajoy á Moncloa
Como paso inmediato para o seu partido, o líder do PP en Galiza salientou a vontade dos populares de "apartar do poder" o presidente do goberno español, José Luís Rodríguez Zapatero, "quen centra a súa actividade en facer política de supervivencia". Na opinión de Feijoo, Zapatero "equivócase subindo os impostos". Advirte Feijoo de que as subidas serán limitadas e temporais tal e como o presidente español anuncia porque "hai impostos que non poden subirse máis, e temprais porque acabarán en dous anos, cando Mariano Rajoy releve ao propio Zapatero e sexa o presidente do Goberno que España e que Galiza necesitan".