Vieiros

Vieiros de meu Perfil


Edición xeral

RSS de Edición xeral
Denuncia do BNG

Mentres se paralizan os centros Quérote, cartos públicos para asociacións antiabortistas

Incerto futuro para os exitosos centros de información afectivo-sexual despregados polo bipartito, mentres a Xunta financia asociacións antiabortistas.

Redacción - 14:05 20/10/2009

"Está á vangarda de todo o Estado en política de información á mocidade, precisamente para, entre outros obxectivos, evitar embarazos non desexados", subliñou este martes Ana Pontón, vicevoceira do grupo parlamentario do BNG, ao respecto da rede de centros Quérote, despregada durante a anterior lexislatura. Pontón denunciou que o Goberno "ten paralizados" estes centros de información afectivo-sexual e expresou a súa preocupación por "este retroceso". Sinalou por exemplo que a Xunta suprimiu durante o pasado verán as campañas que a rede desenvolvía en festivais e outros eventos para a mocidade e laiouse de que nesta lexislatura non se realizou aínda ningunha campaña de información e asesoramento afectivo-sexual para a mocidade.

A denuncia chegou a pé da petición de explicacións á Xunta polo financiamento a asociacións antiabortistas. Avanzou a deputada do Bloque que o seu grupo levará esta demanda ao pleno da próxima semana, censurando que se lle entregue diñeiro público a colectivos "que lles negan ás mulleres dereitos básicos, como o de decidir libremente sobre a súa maternidade". De xeito concreto, Pontón citou o comunicado da secretaría xeral de Igualdade do pasado 14 de setembro onde se garante o financiamento dos gastos de funcionamento da asociación antiabortista Ayuda a la vida. "Unha asociación antiabortista de ultradereita cuxo obxectivo é privar as mulleres dun dereito básico", reprochou Ana Pontón.

A voceira nacionalista considera que este tipo de axudas económicas son exemplo do apoio do PPdeG "aos sectores máis reaccionarios da sociedade española, que pretenden impoñer a súa moral ao conxunto da sociedade e privar as mulleres do dereito a decidir libremente sobre a continuidade ou non do seu embarazo". "Están creando unha confusión intencionada, porque o que estabelece a reforma da lei do aborto é un dereito, non unha obriga", afirmou Pontón.


4.9/5 (10 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: