Vieiros

Vieiros de meu Perfil


Edición xeral

RSS de Edición xeral
MOBILIZACIÓNS

A policía impide o peche de traballadores de oficinas I+B no Consorcio

A CIG acusa a Xunta de "non aforrar en medidas coercitivas" e advirte que as mobilizacións en defensa dos servizos públicos van continuar.

Redacción - 18:20 17/11/2009

A Xunta mobilizou a varios axentes de policía para impedir o peche que tiñan previsto levar a cabo os traballadores das oficinas de Igualdade e Benestar na sede central do Consorcio (Compostela). As forzas de seguridade negáronlle a entrada nas dependencias públicas ao persoal das oficinas comarcais que se desprazaran até Compostela para participar na mobilización.

Ás 17 horas, no momento que estaba previsto que comezase o peche, o propio xerente do Consorcio, Roberto Rodríguez, pediulles que abandonasen voluntariamente os servizos centrais para evitar un desaloxo pola forza. Segundo explicaron as propias traballadoras, Rodríguez asegurou que nunca cuestionara nin a súa profesionalidade nin os méritos de acceso á praza. Antes de abandoar as instalacións e concentrarse fóra, os folguistas exixiron que repetise as mesmas palabras diante dos medios de comunicación presentes.

A CIG denuncia a actitude “coercitiva” da Xunta

A CIG, sindicato maioritario no Consorcio, acusou directamente a conselleira de Traballo e Benestar, Beatriz Mato, de ensaiar unha “actitude represiva” para apagar as voces de protesta. Dende esta organización subliñaron que a presenza policial, dende última hora da mañá, incluso impediu a entrada aos servizos centrais de cidadáns que acudían ao mesmo.

Para a CIG o acontecido este martes reflicte o nerviosismo do Goberno, que ve con preocupación paro xeral convocado para o día 24, cando os traballadores están chamados a unha folga en apoio de 61 compañeiros despedidos.

As mobilizacións previas ao paro proseguirán este mércores cunha concentración diante de San Caetano. Ademais dos partidos políticos da oposición e os sindicatos, diferentes concellos e asociacións de veciños están a mostrar o seu rexeitamento á supresión de programas de Igualdade, Familia e Infancia en 18 comarcas rurais.


4.4/5 (10 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: