Vieiros

Vieiros de meu Perfil


GZ-Sete

Edición xestionada por Vieiros
RSS de GZ-Sete
Asegura que a auditoría evitará a unión

Caballero agoira que a fusión crearía unha entidade "débil e con problemas"

O rexedor vigués cualifica de "intervencionismo" a proposta da Xunta e asegura que o Goberno oculta datos sobre a febleza de Caixa Galicia e Caixanova.

Redacción - 18:00 03/12/2009

"A auditoría vai ratificar que a fusión é unha mala opción", afirmou este xoves o alcalde de Vigo, o socialista Abel Caballero, asegurando que a hipotética fusión de Caixa Galicia e Caixanova crearía unha entidade "débil e con problemas". Malia a posición oficial do seu partido, que deixa aberta a porta á fusión aínda que recomenda que o proceso se inicie a través dun Sistema Institucional de Protección (SIP) que manteña a identidade das dúas caixas, Caballero foi belixerante coa posibilidade da fusión.

"Non haberá fusión", insistiu o rexedor vigués, indicando que o seu partido está a prol de agardar polos informes independentes e afirmando estar seguro de que eses informes revelarán que a fusión de Caixa Galicia e Caixanova non crearía unha entidade abondo forte. Deste xeito, e malia a presunta fortaleza que o propio Caballero teimou noutras ocasións en atribuírlle a Caixanova, do mesmo xeito que o resto das administracións lle atribúen tamén a Caixa Galicia, insinuou o alcalde que o detalle da situación das entidades revelará un escenario peor do que confesan oficialmente.

Segundo a análise de Abel Caballero, a Xunta "oculta datos". Así, o mandatario vigués pregúntase por exemplo que volume de axudas deberá solicitarlle ao Banco de España a caixa fusionada, que indicadores ofrecería e que pasaría coa concentración crediticia. Teimou o alcalde da cidade olívica en que a fusión non a quere "nin Caixanova", nin os empresarios pontevedreses "nin os cidadáns". "Non sería boa para a economía de Vigo", advertiu. De paso, subliñou que a decisión anunciada pola Xunta este xoves é a escenificación dunha decisión política "tomada hai moitos meses". Decisión que, analiza Caballero, "é doada de explicar: prímanse os intereses do norte de Galiza sobre as lexítimas aspiracións do sur".


3.5/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: