Vieiros

Vieiros de meu Perfil


Fwwwrando

RSS de Fwwwrando
Seguridade informática

Alemaña e Francia desaconsellan o uso de Internet Explorer

Organismos públicos dos dous estados europeos advirten do perigo de usar o navegador de Microsoft, despois de que se publicasen novas vulnerabilidades.

Redacción - 12:30 18/01/2010

Dous gobernos europeos coincidiron en recomendar non usar o navegador Internet Explorer de Microsoft polos problemas de seguridade que leva consigo. Por unha banda, a Oficina Federal para a Seguridade da Información (BSI), en Alemaña, publicou unha advertencia desaconsellando o uso do software de Microsoft para navegar pola web, despois de que a compañía estadounidense recoñecese que os fallos no seu produto foron a causa duns recentes ataques contra Google.

Porén, Microsoft rexeitou o consello emitido pola oficina, alegando que o risco para os usuarios é baixo e que os problemas se poden solucionar reforzando a configuración do Explorer. As autoridades alemás replicaron que nin iso fai que o navegador sexa completamente seguro.

Aínda que a próxima actualización de seguridade de Microsoft está prevista para o 9 de febreiro, a compañía asegurou que os seus técnicos xa están traballando en solucionar os fallos canto antes. Ese problema aféctalles a todas as versións do Explorer, aínda que as máis antigas contan con máis problemas.

Mentres, o centro francés especializado no tratamento de ataques informáticos (Certa) fixo pública outra recomendación para que se empreguen navegadores alternativos ao de Microsoft "á espera dunha corrección". Segundo o organismo público, a vulnerabilidade do Internet Explorer permite a execución de código a distancia.


4.88/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: