Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Mobilización este domingo en Compostela

"Terra viva e vida digna", reclama Galiza Non se Vende

Urbanismo caótico, litoral degradado, lingua e cultura menosprezada... Un ano despois do último cambio de Goberno "imos a peor" advirte a plataforma.

Redacción - 13:10 20/03/2010

Pola defensa do litoral, por unha ordenación racional do territorio, pola soberanía alimentaria e enerxética e por outro modelo de transporte. Catro das razóns fundamentais a prol das cales a plataforma Galiza Non se Vende convoca a cidadanía a manifestarse este domingo na capital do país.

"É o tempo de unirnos todos e todas e paralizar as agresións á vida e á Terra!", afirman desde a rede de colectivos. Logo das mobilizacións convocadas durante as últimas semanas en diversos puntos do país, Galiza Non se Vende chega outra vez a Compostela. Desta volta, e un ano despois do cambio de poder na Xunta, aproveitan para laiarse de que "como se esperaba, vamos a peor". "Este goberno, como os anteriores, segue o imposíbel camiño do crecemento indefinido: producir máis para consumir máis, quimera inviábel nun planeta con recursos limitados", expoñen. "Os recursos naturais son postos ao servizo dos intereses económicos e das grandes empresas, subvencionadas con cartos públicos, mentres que aumenta o desemprego e pechan os pequenos negocios", denuncian.

Entre as alertas sobre as que chaman a atención as asociacións vencelladas a esta rede cidadá están o "menosprezo" á lingua e cultura do país; a frouxa aposta polo transporte público que, advirten, é "escaso, ineficaz e está en mans privadas"; o litoral "entregado a construtoras para o grande negocio especulativo"; a introdución de transxénicos no agro; a "inexistente" ordenación do territorio ou a errada política forestal. Estes e outros argumentos, un feixe de desafíos que, reclaman, fan necesario "esixir a participación da sociedade nos procesos de decisión". "É hora de saír á rúa e reclamar outro modelo económico e social", reivindican.

A cita na Alameda de Compostela desde as 12horas deste domingo.


4,11/5 (18 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: