Vieiros

Promocionar e homenaxear á figura de Alexandre de Fisterra, o inventor do futbolín. Este é o obxectivo dunha iniciativa que este sábado bota a andar na súa vila natal: o Primeiro Campionato Popular de Futbolín Alexandre de Fisterra.

A organización corre a cargo da “Plataforma Fisterra, único fin do camiño”, que quere rememorar a este ilustre persoeiro, “loitador incansábel pola liberdade nos tempos do franquismo, poeta, editor no exilio e inventor do futbolín”, entre outros moitos méritos. Este colectivo entende que a figura de Alexandre Campos Ramírez (Fisterra, 1919-Zamora,2007) “non pode ficar no esquecemento” e que “é preciso lembralo e adicarlle esta homenaxe na vila que o viu nacer”.

Como mellor xeito de renderlle tributo escolleron un campionato do invento polo que foi universalmente coñecido: o do futbolín. O torneo, ademais, ten vocación de continuidade e agardan que se converta nunha cita fixa no calendario. Será este sábado, na praza da Constitución de Fisterra, onde desemboca a rúa adicada a Alexandre Fisterra, a partires das catro da tarde. Para a ocasión, deseñáronse tres categorías (infantil, xuvenil e adultos) que recibirán premios dotados polos comercios da comarca.

• Anterior: Nin play station nin wii, en Fisterra tralla brava co futbolín