Vieiros

Vieiros de meu Perfil


Edición xeral

RSS de Edición xeral
Audiencia media do 10,4% en xuño

A TVG, "en caída libre"

O PSdeG atribúe a perda de telespectadores e de cota de audiencia da canle pública á "manipulación e censura sen precedentes" do actual Goberno.

Redacción - 12:00 04/07/2010

A canle pública de televisión TVG "está en caída libre" debido á perda de telespectadores e de cota de audiencia, sinala o PSdeG nun comunicado enviado aos medios este domingo, onde atribúe a situación á "manipulación e censura sen precedentes" do actual Goberno da Xunta.

En xuño a audiencia media foi do "10,4%, a peor cifra de toda a historia da canle autonómica", afirman os socialistas, e precisan que até o de agora a marca máis baixa alcanzada pola TVG era do 11,8% en agosto de 2009.

Sinala que logo de chegar ao poder o ano pasado o actual presidente da Xunta, Alberto Núñez Feijoo, líder do PPdeG, houbo un descenso da cota de telespectadores da canle, unha situación que o PSdeG considera "especialmente preocupante porque se produce en todas as faixas horarias".

Concretamente, constatan o maior baixada na programación da tarde. En xuño, os programas de noticias neste horario "caeron estrepitosamente e situáronse por baixo do 10%" da cota de audiencia, din.

Engaden, ademais, que de luns a venres os informativos da tarde tiveron unha cota de audiencia media do 9,7% e as fins de semana do 7,9%. Os do mediodía rexistraron unha cota de audiencia media de luns a venres do 26,6% e as fins de semana inferior ao 19%, cando o anterior equipo lograba superar o 30%, afirman na nota os socialistas.

O deputado Ricardo Varela, portavoz do PSdeG na comisión parlamentaria de control da TVG, denuncia ao respecto a "espectacular caída da audiencia", que obedece a que "os telespectadores galegos non son inxenuos". "Non se trata dun problema de programación, senón de manipulación e de mentira", afirma.


4.63/5 (24 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: