Vieiros

Vieiros de meu Perfil


Edición xeral

RSS de Edición xeral
Faraa pública esta quinta feira

Decisiva, aínda que non vinculante, opinión da Corte Internacional de Xustiza sobre a secesión de Kosovo

Logo da declaración unilateral en febreiro de 2008 por parte dos albano-cosovares, Serbia levou o caso ao Alto Tribunal da ONU.

Redacción - 11:00 22/07/2010

A Corte Internacional de Xustiza (CIX) vaise pronunciar esta quinta feira pola tarde sobre a legalidade da declaración de independencia de Kosovo, moito antes do prazo previsto, segundo informan medios da rexión dos Balcáns.

Logo da declaración unilateral en febreiro de 2008 por parte dos albano-cosovares, Serbia -radicalmente oposta á decisión- levou o caso á CIX. O proceso desenvolveuse entre o 1 e o 11 de decembro de 2009, mais será esta quinta cando se dea a coñecer a opinión non vinculante.

Tanto o goberno serbio como o de Kosovo cren que o Alto Tribunal da ONU amparará os seus respectivos intereses. O presidente cosovar, Fatmir Sejdiu, cre que "se abrirán novos procesos nesta importante historia, que foi un proxecto conxunto coa comunidade internacional".

Ademais, o seu primeiro ministro, Hashim Thaci, de visita nos EUA recibiu de novo o apoio incondicional da Casa Branca, que prometeu apoiar o ingreso do país balcánico na Unión Europea e na OTAN.

Pola súa banda, o presidente de Serbia, Boris Tadic, afirmou que "de se estabelecer un novo principio, abriríase un proceso de creación de novos estados por todo o mundo, desestabilizando moitas rexións". Kosovo xa foi recoñecido por 69 estados. Entre estes non está o español.


4.43/5 (7 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: