Vieiros

En rolda de prensa logo de xuntanza cos conselleiros de Educación dos gobernos "populares", Fraga non só confirmou candidatura senón que expresou a súa vontade de completar lexislatura no caso de gañar cualificando de "calumniosas" as voces que apuntan unha retirada poselectoral en favor dun "tapado".

Entre o cisma e o fracaso semellaban moverse os agoiros de Manuel Fraga sobre o futuro do seu partido en Galiza ao tempo que subliñaba a súa intención de optar a un novo mandato á fronte do executivo galego.

Así, dunha banda vendeuse coma candidato "en plena forma para que o partido non se divida" e doutra quixo lembrar ao chanceler alemán Konrad Adenauer, quen se retirou aos 87 anos "un ano máis tarde aínda do que remata o meu mandato" e que tivo coma sucesor a Ludwig Erhard "quen fracasou e deu paso ao pouco tempo a un goberno doutro signo".

Fraga gabou tamén os "anuncios moi importantes dende lugares decisivos" en favor da súa candidatura, en referencia ás recentes declaracións de Rajoy ou dos seus posíbeis sucesores, Alberto Núñez Feijoó e Xosé Manuel Barreiro e quixo descartar ademais que as próximas eleccións autonómicas vaian ser adiantadas.