Vieiros

Os traballadores da CRTVG realizarán este mércores o primeiro dos paros convocados polo Comité Interempresas logo do fracaso da negociación do convenio colectivo. O paro producirase entre as 12 e media e as 2 e media da tarde e entre as 6 e media e as 8 e media do serán. O primeiro dos paros prodúcese durante a emisión dos programas A Revista e Galicia Noticias, o informativo de maior audiencia da cadea. Porén, é difícil que a folga do persoal da TVG teña algún efecto na emisión. Segundo os sindicatos, os servizos mínimos prevén que en moitos departamentos haxa o mesmo número de traballadores ca un día normal, polo que serán denunciados polo Comité. Ademais, en previsión dun seguimento masivo da folga, a dirección da TVG ordenou que o programa A Revista, que inclúe numerosas conexións en directo, xa se gravase na tarde do luns.