Vieiros

"O Banco Mundial e os países que se opuxeron á declaración do acceso á auga potábel coma un dereito fundamental, son responsábeis do fracaso do Foro Mundial da Auga. Por iso, debería tratarse esta proposta na Asemblea Xeral das Nacións Unidas, onde as grandes empresas, cando menos teoricamente, non teñan acceso e capacidade de influencia". Así o pediron desde o colectivo Ecoloxistas en Acción, denunciando que non se cumprisen os obxetivos principais que se fixaran para este cumio internacional.

A declaración acordada ao peche do Foro apenas subliña a "necesidade de incluír a auga e o saneamento coma prioridades nos procesos estatais, en particular nas estratexias de desenvolvemento sustentábel e redución da pobreza", pero evita introducir as peticións para que se definise coma "dereito humano", ou coma propoñía a Unión Europea, "dereito fundamental".

Lembrámoslles que segundo as cifras da ONU, cada ano morren dous millóns de persoas por enfermidades vencelladas coa falta de acceso a auga potábel, o 90% cativos menores de cinco anos. Máis de mil millóns de persoas non teñen acceso a augas seguras e máis de 2.500 millóns non dispoñen de sistemas sanitarios básicos.