Vieiros

"Este goberno desde a súa chegada, en colaboración coas organizacións sindicais, está sometendo a concurso todas as vacantes existentes, nun proceso que paseniñamente vainos permitir reducir a temporalidade", indicou Xosé Luís Méndez Romeu, ao fío dos 800 postos que pasarán a ser cubertos por concurso e que até o de agora eran prazas de libre designación.

Méndez Romeu laiouse da "herdanza do goberno anterior" e a falta de vontade para resolver un probelma "ata o último pleno que estiveron en exercicio, cun intento de decretazo", recordando o intento dos populares de deixar amarrados á Xunta a estes cargos introducidos a dedo na administración galega. Relatou o conselleiro que esta mesma semana rematarán os traballos de reforma da Lei da Función Pública de Galicia que na súa opinión "vai darlle cumprimento aos compromisos electorais do goberno, fundamentalmente a redución dos postos de traballo de libre designación, o desenvolvemento da carreira administrativa, un maior compromiso para o acceso das persoas con discapacidade á administración e unha resolución moderna de problemas enquistados hai moitos anos que intentaron ser resoltos con medidas expeditivas no pasado mes de xullo".