Vieiros

Vieiros de meu Perfil


Edición xeral

RSS de Edición xeral
CRÓNICAS DESDE ETIOPÍA 15

A importancia do conseguido

Adugna, o grupo de danza iniciado por Meseret e outras mozas e mozos desfavorecidos, e Adugna Potentials realizan actuacións conxuntas. Emocióname a súa paixón, o seu interese, a súa capacidade para transmitir, o seu amor propio. "Queremos amosar á nosa comunidade o noso potencial". Ao principio ninguén pensaba que fosen conseguilo. María Reimóndez, de Implicadas no Desenvolvemento escribe para Vieiros desde Etiopía.

- 10:32 26/08/2006
Tags:

Persoas que bailan
Ao son da música no alpendre de Adugna, un grupo de persoas bailan. Moldean os seus corpos de maneiras plásticas, transmitindo emocións que superan a linguaxe das palabras. Como elementos decorativos algúns obxectos: muletas, unha cadeira de rodas. Concéntranse na súa clase con Meseret e ensaian unha actuación. Irrelevante é o feito de que as súas pernas non funcionen, ou que os seus brazos teñan unha parálise. Son só persoas que bailan.

Potencial
Adugna Potentials é o grupo de baile para persoas con discapacidade que Meseret ten en marcha dende hai seis anos. Convídannos a asistir a unha das súas sesións. Ao rematar sentamos no chan comentar inquedanzas, pregúntanme se coñezo algunha iniciativa semellante no meu país, falan da importancia do conseguido. A danza non é aquí unha terapia corporal. É unha expresión artística de alto nivel. Adugna, o grupo de danza iniciado por Meseret e outras mozas e mozos desfavorecidos, e Adugna Potentials realizan actuacións conxuntas. Emocióname a súa paixón, o seu interese, a súa capacidade para transmitir, o seu amor propio. "Queremos amosar á nosa comunidade o noso potencial". Ao principio ninguén pensaba que fosen conseguilo. Pero así son tantas veces as cousas cando alguén nos dá o mínimo apoio. O potencial está dentro de cada quen.

Plans
Despois da clase, dunha mini demostración de Bharatanatyam e de ver a Meseret e dúas compañeiras representar unha peza sobre a forza das mulleres imos tomar un café con calma falar de plans de futuro. Na nosa mente o intercambio. Poucas veces nos damos conta as persoas que vivimos na suposta sociedade da información do importante que é o contacto para quen está en lugares remotos, para quen queda fóra. Meseret quere que a axudemos a traer xente de noso darlles talleres, mesmo se eu penso que quen temos que aprender somos nós. De aí que engadamos algo máis á idea e comecemos a remexer para poder traer a Meseret e algunha compañeira a Galicia. Estendendo pontes coa danza. Avisadas/os quedades, danzantes.

Anteriores:


0/5 (0 votos)