Vieiros

A discriminación antisindical, os problemas co dereito á folga e a discriminación salarial coas mulleres son tres dos puntos que máis destaca a análise realizada pola Confederación Sindical Internacional. Ningún dos estados da UE escapa á crítica, aínda que as denuncias son maiores cara aos socios máis recentes.
Alén de que na teoría os principais convenios internacionais para a protección dos dereitos dos traballadores fosen asinados por todos os membros da Unión Europea, a práctica amosa que é habitual a violación dos dereitos e o incumprimento das lexislacións laborais. Salientan o caso da desigualdade da muller no ámbito laboral, especialmente importante nos salarios, que son significativamente máis baixos en todos os estados.
Alén diso, as mulleres sofren de maiores índices de desemprego, apenas aparecen nos postos de relevancia ou sofren de máis traballos a tempo parcial. O informe refírese a unha fenda importante "tanto na lexislación como na práctica" e advirte que nalgún país o salario dunha muller chega a ser até un 40% menor que o dos seus compañeiros homes. Ademais, láianse de que o acoso sexual "segue sendo un problema".
Por outra parte, o estudo ocúpase tamén da liberdade sindical, criticando as cancelas á negociación colectiva, o despedimento de traballadores temporais polo feito de estaren sindicados ou as limitacións "excesivas" do dereito a folga. Neste ámbito, as denuncias van fundamentalmente contra países como Eslovaquia, Hungría, Letonia, Lituania, Polonia, Romanía, Bulgaria e a República Checa.