Vieiros

Os quebequeses elixen este luns nas urnas os seus representantes para os vindeiros catro anos. As sondaxes prognostican un empate entre os dous principais partidos, o Partido Liberal do Quebec (PLQ, centro-dereita federalista) e o Partido Quebequés (PQ, centro-esquerda independentista), e un terceiro, Acción Democrática do Quebec (ADQ, populista autonomista), máis minoritario noutros comicios.

A sorprendente subida do ADQ de Mario Dumont, un populista conservador coñecido como o "Jean-Marie Le Pen do Quebec" débese en grande medida a súa política de rexeitamento do multiculturalismo, especialmente no que se refire aos musulmáns.

Da independencia ao multiculturalismo
Tradicionalmente, o principal tema na loita electoral quebequesa era a independencia deste territorio do Canadá, factor de polarización dos votantes entre os seus defensores, o PQ, e os seus detractores, o PLQ, formacións que alternaron o poder durante décadas.

Porén, o debate nesta ocasión centrouse en determinar até que punto son aceptábeis as prácticas sociais e culturais das comunidade étnicas en expansión na rexión, tras varios casos que abriron un intenso debate na sociedade quebequesa.

En datas pasadas, un centro deportivo viuse forzado a pintar as fiestras da súa piscina para evitar que os seus usuarios fosen vistos en bañador, logo da presión dunha sinagoga conservadora. Outro exemplo, é a expulsión dun dunha cativa de once anos dun partido de fútbol por vestir un niqab.

Goberno en minoría
Mario Dumont, que se describe a si mesmo como un autonomista que quere máis poder para o Quebec, defende un control máis restritivo neste tipo de asuntos. O hipotético salto cuantitativo do ADQ nestas eleccións facilitaría a aprobación dalgunhas medidas nesta dirección.

Ademais, se as sondaxes acertan, o Quebec contaría por primeira vez na súa historia cun goberno sen maioría. Os líderes dos tres principais partidos xa anunciaron a súa intención de non se unir co outro derrotado para bloquear ao vencedor.