Vieiros

Membros de Batasuna presentaron esta terza feira ante o rexistro do Ministerio do Interior toda a documentación necesaria para a inscrición dun novo partido. O nome desta nova formación abertzale sería o de Abertzale Sozialista Batasuna.

Segundo o recolle o diario Gara, o partido aposta nos seus estatutos por utilizar "exclusivamente as vías políticas democráticas" co fin de conseguir "a independencia e o socialismo".

Acto en Barakaldo
Estaba previsto que o vindeiro sábado a esquerda abertzale desenvolvese un acto no Bilbao Exhibition Centre de Barakaldo (Biscaia). Durante a presentación da convocatoria á prensa, o pasado 25 de marzo, o membro de Batasuna Tasio Erkizia anunciou que no evento se detallarían as "liñas mestras da nosa actuación en concellos e xuntas xerais".

As actividades políticas de Batasuna foron suspendidas polo xuíz da Audiencia Nacional Baltasar Garzón nun auto do 26 de agosto de 2002. Posteriormente, a Sala Especial do Tribunal Supremo ilegalizou e disolveu a formación, tras considerar que a formación era parte da organización ETA.

Comunicado de ETA en andamento
O líder de Batasuna, Arnaldo Otegi, confirmou en varias ocasións a súa intención de concorrer nas eleccións municipais do próximo 27 de maio, aínda que sen matizar a fórmula: baixo unha nova marca, a través de agrupacións electorais ou participando nas listas do Partido Comunista das Terras Vascas (EHAK, nas súas siglas en éuscaro).

O goberno español declarou en diversas ocasións que só aceptará a participación da esquerda abertzale nos comicios cun rexeitamento expreso da violencia. Porén, a inscrición deste novo partido podería ser un paso previo á hipotética publicación dun comunicado de ETA anunciando o abandono das armas.

Valoracións políticas diversas
Ao respecto, o presidente do goberno español, José Luís Rodríguez Zapatero, avanzaba na noite do martes que o ministerio atopa "indicios de ilegalidade" na nova formación, e que xa lle remitiu informe ao fiscal xeral do Estado. "Se é un partido ilegal non pode ser nin partido nin presentarse ás eleccións", dixo. Desde o PP, Mariano Rajoy xa solicitou directamente que se ilegalice ao partido.

As voces máis optimistas chegaron desde outros partidos. O voceiro da executiva do PNV, Íñigo Urkullu, opinou que a inscrición do novo partido é un chanzo "inexcusábel" da esquerda abertzale para ir ás municipais. Desde IU apostan pola constatación dunha "maduración" das conviccións democráticas do contorno de Batasuna. Por Aralar, o seu vicecoordenador, Jon Abril, dixo agardar que o partido non sexa ilegalizado e que poida ser votado polos cidadáns o próximo mes de maio, reflexionando que contribuirá á "normalización política" de Euskadi.