Vieiros

O polémico cineasta estadounidense Michael Moore xa non terá problemas para que o seu último filme, Sicko, se vexa no seu país. Moore deixou hai uns días unha copia da fita en Canadá, por se acaso o FBI decidía confiscalo. Pero non farán falla tantas precaucións: a produción xa se atopa nas redes de intercambio de arquivos.

En Sicko, documental que critica o desigual sistema de saúde dos EUA, aparecen escenas rodadas en Cuba sen autorización do goberno. Moore, aínda que xustificou a súa viaxe por una “investigación xornalística”, manifestou o seu temor a que o filme fose secuestrado, pois os cidadáns estadounidenses teñen prohibido viaxar ao país caribeño por mor do embargo.

Pero a difusión do filme a través do BitTorrent permitirá que, aínda que o Departamento de Tesouraría o confisque, sigan a circular copias do documental.

Canal no YouTube
 Paralelamente, Moore abriu un grupo no YouTube dedicado a Sicko. Nel convida os internautas a que presenten os seus propios vídeos sobre os seus problemas coa Sanidade pública estadounidense. Xa hai 50 respostas e máis de 700 persoas inscritas.
Na web oficial de Sicko, que ten previsto estrearse o 29 de xuño, hai aberto un blog que recolle experiencias sobre o sistema sanitario, tanto público como privado, dos EUA e mais do resto do mundo. Unha parte dos casos expostos amosan cidadáns estadounidenses que se marabillan dos sistemas sanitarios estranxeiros. Michael Moore pretende que as achegas do público acaden o Congreso do seu país, para que os representantes políticos as poidan ter en conta.