Vieiros

Aínda que se falou de darlle entrada a capital foráneo, as partes están convencidas de que é posíbel sacar adiante un grupo exclusivamente galego. Leite Río e Feiraco, coa unión da moito máis pequena Colaga, poden acadar un nivel de facturación anual moi superior aos 300 millóns de euros. Isto significaría que o novo proxecto entraría entre as vinte primeiras empresas do país

A importancia estratéxica desta concentración é clara. O grupo resultante pasaría a estar na lista das vinte empresas que máis facturan en Galiza. A aposta xeraría preto de 500 postos de traballo directos, ao que habería que sumar a máis que posíbel creación de pequenas empresas auxiliares.

Os contactos entre Leite Río, Feiraco e Cooperativas Lácteas de Galicia (Colaga) continúan cos responsábeis de Medio Rural como promotores das conversas. Tal e como sinalabamos nunha información anterior, as dúas caixas galegas teríanse comprometido coas partes a apoiar a operación.

Aínda que as fontes oficiais se negan a facilitar ningunha información ao respecto das negociacións do Grupo Lácteo Galego, estas están cada vez máis avanzadas. Algunhas voces, as máis optimistas, apuntan que o peche do acordo pode ser só cuestión de semanas pero outros sinalan que hai punto importantes por concretar.

O que si semella claro é que a principal aposta é polos produtos con valor engadido, algo que demandaron, ao fío das informacións xornalísticas, sindicatos coma Unións Agrarias. Tanto as empresas coma a consellaría son conscientes de que é preciso deixar de producir leite barato para terceiros e intentar crear plusvalías do produto.