Vieiros

Unha colisión do buque gaseiro ou unha rotura do casco son dous exemplos de escenarios de risco posíbeis no contorno das plantas de gas. Nos últimos anos existen a nivel internacional diversos exemplos de estudos sobre as consecuencias que accidentes dese tipo terían en regasificadoras concretas.

Por exemplo, ABS Consulting estabeleceu en 2004 que nun posíbel accidente dun gaseiro e cun burato de menos dun metro cadrado, avaliando un vertido de 21 mil metros cúbicos de gas natural licuado a ameaza de inflamabilidade esténdese nun área de até 4.800 metros desde o lugar do accidente. Neste caso concreto, os expertos recomendan que a chamada "zona de exclusión térmica a pé da planta debera ser de arredor de 860 metros.

Paradoxalmente, no caso da planta ferrolá esa zona de exclusión térmica no perímetro das instalacións non existe, estando as vivendas a menos de cen metros e mesmo a vila de Mugardos a apenas medio quilómetro. Atendendo á comparativa coas análises de riscos realizadas para outras plantas en todo o mundo, desde Cidadáns Aliados polo seu Contorno, o grupo universitario vencellado ao Comité Cidadán de Emerxencia, consideran que a planta ferrolá debera construírse como mínimo a 4.500 metros da cidade "e a non menos de 600 metros das propiedades limítrofes en zonas habitadas". O mesmo criterio debera estabelecerse para a rota de aproximación dos buques gaseiros.

Novos incumprimentos para a lista
Xa que logo, segundo o Comité, a planta de Reganosa incumpriría en concreto a norma europea UNE-NE-1473. Segundo esa lexislación, o emprazamento dunha planta GNL con respecto ao contorno no que se constrúa debe atender a unha estrita avaliación de riscos. De xeito específico, as distancias de separación deben ter en conta "os niveis de radiación, os contornos de límite inferior de inflamabilidade, os efectos de explosións, os ruídos".

Por riba, a mesma norma subliña que debe haber unha Avalaciación Previa de Impacto Ambiental, para decidir sobre o emprazamento proposto e unha vez escollido un novo estudo ambiental "detallado" que confirme que se cumpre cos regulamentos. No caso da planta de Ferrol "non se realizou a avaliación de impacto aviental".