Vieiros

Vieiros de meu Perfil


Galego.org

Xestionado por Vieiros
RSS de Galego.org
Despois das declaracións sobre o galego

"Imparcialidade" e "nula sintonía" coa lingua: mal agoiro sobre o Valedor

Desde o Movemento polos Dereitos Civís ven a polémica estrea de Benigno López no cargo como un exemplo do ineficaz proceso de escolla empregado polo Parlamento.

Redacción - 13:30 01/08/2007
Tags: MpDC Valedor

"Non temos constancia do seu traballo previo polos dereitos cidadáns", sinalan desde o Movemento dos Dereitos Civís, MpDC, ao respecto de Benigno López. O colectivo ve con preocupación o futuro da institución e máis aínda nun momento en que o obxectivo debera ser reformala e facela gañar en protagonismo.

O MpDC é especialmente crítico co sistema para a elección do Valedor do Pobo. "Necesita algo máis ca un consenso entre as forzas políticas; necesita un consenso social que permita pór diante desta institución a persoas que sexan realmente sensíbeis cos dereitos da cidadanía", expoñen. Nese sentido, insisten en que un proceso de escolla máis rigoroso evitaría que gañasen o posto "figuras como a do señor Sande ou persoas que fagan declaracións como as do señor Benigno".

"Nula sintonía cos problemas lingüísticos de Galiza"
Así avalían a posición de Benigno López González despois das entrevistas publicadas pola prensa o pasado martes onde se recollían as súas polémicas opinións sobre a lingua. "Resulta moi complicado ter confianza na imparcialidade do Sr. Benigno e pensar que vai defender os dereitos lingüísticos recoñecidos na lexislación vixente", láianse no MpDC.

"Da súa intervención pódese extraer unha minusvalorización do galego que non lle permite visualizar como importante a defensa dos noso idioma". O colectivo agarda que iso non se traduza en demoras na aceptación e trámite das queixas que fagan referencia a este ámbito. Por isto, subliñan que se o novo Valedor se ratifica no dito, debería dimitir "por recoñecer implicitamente a súa incapacidade para actuar con obxectividade nos asuntos que se lle presenten".


4.43/5 (7 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: