Vieiros

A decisión do Comité de Asuntos Exteriores da Cámara de Representantes dos Estados Unidos chega nun momento complicado. A diplomacia estadounidense traballa estes días para frear a intención de Turquía de realizar unha operación militar ao norte de Iraq, no Curdistán iraquí. O primeiro ministro turco xa recoñeceu, despois da presión do alto mando do exército nas últimas semanas, que o seu goberno deseñou o plan de autorización dese ataque, que desde os EUA temen que contribúa á desestabilización da zona.

Nese contexto chega a resolución da Cámara estadounidense, que aprobou cualificar de xenocidio os masacres promovidos en 1915 en Armenia, episodio que nos últimos cen anos Turquía se resistiu sempre a recoñecer. Malia que os historiadores coinciden en denunciar que até millón e medio de armenios morreron a mans dos turcos durante aqueles episodios en tempos da 1ª Guerra Mundial, desde o goberno turco teiman en cualificar de "inaceptábel" calquera referencia ao suceso.

O presidente dos EUA, George W.Bush, xa instou aos representantes mesmo antes da votación, a non aprobaren a proposta, e posteriormente afirmou que "non é a resposta correcta a esas históricas matanzas masivas". Ao fío, a secretaria de Estado, Condoleezza Rice, agoirou que será problemática e "desestabilizadora" para a actividade dos EUA en Oriente Medio, destacando que Turquía é "un aliado estratéxico importante" dos estadounidenses.