Vieiros

A mensaxe de cambio lanzada por Barack Obama tivo éxito entre as bases do Partido Demócrata do estado de Iowa. Os prognósticos falaban da súa vitoria no caso de que houbese unha ampla mobilización, e os primeiros datos indican que a afluencia de independentes e mocidade avalou o seu triunfo.

Obama apañou o 38% dos votos. Atrás del, John Edwards conseguiu situarse na segunda posición, 30%, e Hillary Clinton caeu á terceira, 28%. Os dous prometeron dar batalla nas próximas votacións, mentres por baixo deles, o senador Joe Biden e o ex gobernador de Novo México, Bill Richardson, anunciaban que deixan a loita.

"Cando miredes cara a atrás, lembraredes esta noite, porque aquí foi onde comezou todo", declarou Barack Obama na súa primeira intervención pública despois de coñecerse a súa vitoria. De seguido, insistiu nalgunha das súas promesas principais, como son as de introducir a cobertura médica universal nos EUA ou reducir a dependencia do petróleo. Pola súa banda, Hillary Clinton destacou no seu discurso a súa intención de "poñerlle fin á guerra de Iraq".

No lado do Partido Republicano, o ex gobernador de Arkansas, Mike Huckabee, foi o vencedor por ampla diferencia, un 34% dos votos, por diante do ex gobernador de Massachussetts, Mitt Romney. "Demostramos que a política dos EUA está nas mans do pobo e non nas dos que proporcionan os cartos", comentou Huckabee, quen de momento conseguiu recadar para a súa campaña unha cantidade significativamente menor cá dos seus adversarios.

As webs oficiais dos candidatos do Partido Demócrata:

• Barack Obama
• Hillary Clinton
• John Edwards
• Bill Richardson
• Dennis Kucinich
• Joe Biden
• Christopher Dodd
• Mike Gravel

• Rudolph Giuliani
• Mike Huckabee
• John McCain
• Mitt Romeny
• Fred Thomson
• Duncan Hunter
• Ron Paul

• No Washington Post
• NO New York Times