Vieiros

O primeiro ministro portugués, José Sócrates, deulles a razón aos galegos que traballan en Portugal, mais que teñen fixada a súa residencia en Galiza.

Este sábado, ao termo da XXIII Cimeira Ibérica de Braga, anunciou cambios na lei que lles esixe que cambien as matrículas dos seus vehículos a placas portuguesas, co conseguinte gasto.

En conferencia de prensa conxunta co presidente do goberno español, José Luis Rodríguez Zapatero, Sócrates considerou que a Lei do Imposto sobre os vehículos "non está á altura" da relación de "colaboración" entre os dous países veciños.

Por iso, dixo que o Consello de Ministros aprobará a vindeira semana modificacións a esta norma para que "todos os cidadáns españois, moitos deles médicos que o país precisa" non teñan que se desprazaren a Portugal "con outro coche que non sexa o seu".

Poderanse acoller aos cambios -que terá que aprobar o parlamento- precisou, aqueles empregados que, a data do 31 de decembro de 2007, teñan residencia no Estado Español con agregado familiar.