O sindicato afirma que a nova executiva toma represalias contra os traballadores que se posicionaron coa candidatura de Xurxo Álvarez.
As liortas internas no Sindicato Labrego son unha constante dende que o pasado mes de novembro Carme Freire se converteu na nova secretaria xeral logo de vencer á candidatura liderada por Xurxo Álvarez. Agora a CIG entra tamén no conflito acusando á actual dirección de “purgar” a aqueles traballadores que non están conformes coa liña oficial.
O último enfrontamento ten lugar logo de que o SLG decidise prescindir dunha traballadora de Silleda que tiña un contrato “fin de obra”. Dende a CIG aseguran que pode haber nos vindeiros meses até 25 despidos entre o persoal técnico do sindicato agrario.
Dende o sector oficial do SLG negan que haxa “purgas”, tal e como afirma a CIG. Fontes consultadas por Vieiros acusan ao sector liderado por Álvarez de deseñar unha estratexia que busca “deslexitimar” á actual dirección. Segundo esta versión, os problemas radican na decisión de prohibir que aqueles traballadores que non estean dados de alta en tarefas do agro poidan formar parte dos órganos de dirección. Porén, aseguran que o apoio que ten a a liña crítica entre a afiliación é “moi escaso”.