Vieiros

O Goberno aprobou unha orde da Consellaría de Traballo que concederá subvencións para realizar actividades de información, orientación e busca de emprego. Por primeira vez, o galego será criterio de puntuación á hora de obter as axudas. Os beneficiarios son as universidades públicas, as corporacións locais, as confederacións e asociacións empresariais e sindicais e as entidades especializadas na atención a colectivos. Investiranse preto de 10 millóns de euros até o remate da lexislatura.

Por outra banda, o Consello da Xunta deulle luz verde a un decreto da Consellaría de Medio Rural para delimitar os territorios forestais do país de xeito que se poidan realizar traballos silvícolas e elaborar plans forestais por zonas. En total, márcanse 19 distritos. Na provincia da Coruña, Ferrol, Bergantiños, Santiago, O Barbanza e Fisterra. En Lugo, A Mariña, A Fonsagrada-Os Ancares, Terra de Lemos, Lugo-Sarria e Terra Chá. Na provincia ourensá delimítanse O Ribeiro-Arenteiro, Miño-Arnoia, Valdeorras-Trives, Verín-Viana e A Limia. Por último, Pontevedra divídese en Deza-Tabeirós, O Condado-A Paradanta, Vigo-Baixo Miño e Caldas-O Salnés.

No eido educativo, autorizouse ampliar o convenio de colaboración entre o Ministerio de Educación e Ciencia e a Consellaría de Educación e Ordenación Universitaria para desenvolver as accións do proxecto Internet na aula. A Xunta achegará 129.447 euros en 2008 e o Ministerio transferirá outros 129.447 para colaborar na formación do profesorado nas tecnoloxías da información e da comunicación.

Amais destas medidas, aprobouse este venres o decreto que marca os criterios básicos para autorizar programas e actividades de prevención do consumo de drogas e constitúe o Comité Técnico de Prevención de Drogodependencias. Así, materialízase o obxectivo do Plan de Galiza sobre Drogas 2007-2009 do Servizo Galego de Saúde.