Vieiros

A Organización para a Alimentación e a Agricultura da ONU (FAO, nas súas siglas en inglés) precisa recabar polo menos 500 millóns de dólares (case 338 millóns de euros, ao cambio deste luns) nas vindeiras catro semanas para evitar ter que racionar a axuda alimentaria que reciben 73 millóns de persoas de case 80 países.

Tal e como avanzara en febreiro Josette Sheeran, directora executiva do Programa Mundial de Alimentos (PMA) que xestiona esta axuda, a axencia podería ter que "limitar as racións alimentarias ou o número de recipientes" se os países doadores non achegan máis cartos para facer fronte ao rápido aumento dos prezos nos produtos básicos do sector agrícola.
O PMA remitiu este domingo de Pascua unha carta aos gobernos destes países ricos coa "petición extraordinaria urxente" para que acheguen a cantidade de diñeiro, segundo informa o xornal económico Financial Times que tivo acceso a unha copia do escrito.

"Solicitámoslle ao seu goberno que sexa o máis xeneroso posíbel para axudarnos a cubrir este déficit -que ascendía a 500 millóns de dólares o 25 de febreiro e que está a medrar día tras día", escribe Sheeran, que é quen asina a carta.